karbinci i regionalnata komora so sedishte vo shtip potpishaa memorandum

Карбинци и Регионалната комора со седиште во Штип потпишаа меморандум

ноември 24, 2016

15.250 293

Претседателот на Регионалната комора со седиште во Штип при Стопанската комора на Македонија, Наум Барзов и градоначалникот на општина Карбинци Зоран Минов потпишаа Меморандум за соработка

Барзов појасни дека соработката ќе се одвива во делот на развојот на земјоделството и преработувачката индустрија бидејќи Карбинци е рурална општина, каде се произведуваат земјоделски производи, но и се преработуваат и се извезуваат на странските пазари.

-Во таа насока е и оваа презентција која ја организираме, а на која ќе ги запознаме бизнисмените и инвеститорите кои егзистираат во оваа општина со можностите за развој на земјоделското производство и начините како да се дојде до поголеми приноси, до поголеми добивки и до поголеми можности за инвестиции, вели Барзов.

Тој посочи дека како Регионална комора имаат советодавна улога за бизнис заедница. Иницијативите и идеите кои ги слушнале од страна на земјоделците и бизнис секторот од оваа област ќе бидат доставени до надлежните институции со цел да се подобрат условите за работа и инвестиции во овој сектор.

Градоначалникот на Карбинци Минов истакна дека соработката со Регионалната комора со седиште во Штип е од големо значење за општината во која е најразвиено земјоделството и сточарството.

-Ќе одржуваме и работилници се со цел да се поттикнат сите бизнис идеи и развој, кои ќе значат економско зајакнување на општина Карбинци, рече Минов.

Васко Златковски од Канцеларијата за рурален развој на Земјоделскиот факултет-Штип на работилницата истакна дека земјоделците и сопствениците на преработувачките сектори за да имаат пласман на своето производство на европските и светските пазари треба да го прилагодат производството на стандардите, кои ги бара Европската унија.

-Веќе десетина години наназад европското земјоделско производство почива на спроведување стандарди за производство на безбедна и здрава храна. Тоа значи дека треба да се преземат низа мерки и активности, кои ќе значат спречување на загадување на човековата околина од вештачки ѓубрива, од пестициди и се она што значи уништување на живот свет и прекинување на синџирите кои го чинат тој жив свет, рече Златковски.

Тагови