Филип Митовски (26) е козар и земјоделец: „Имам 150 кози, станувам во 6 часот наутро за да ги измолзам“
„Еден типичен ден како козар на нашиот имот во селото Дурачка Река ми изгледа вака: Се будам во 06.00 часот и се молзат козите, им се става крма за јадење и после се тераат на напасување до вечерта, па повторно молзење“, вели Филип Митовски (26) од кривопаланечко за CRNOBELO.com.
Филип Митовски (26) од селото Дурачка Река, кај Крива Паланка, по професија е земјоделец, инаку има завршено средно училиште за електро техничар за компјутерска техника и автоматика.
Toj покрај со земјоделство се занимава и со чување на кози, а со семејството прават урда и сирење.
„Со земјоделство и чување кози на нашиот имот во Дурачка Река се занимавам уште од мали нозе, буквално откако знам за себе.
Еден типичен ден како козар ми изгледа вака: Се будам во 06.00 часот и се молзат козите, им се става крма за јадење и после се тераат на напасување до вечерта.
Преку ден исто се носат да се напојат вода и вечерта доаѓаат од напасување и пак се молзат и вечерта веќе одмараш. Тоа е еден типичен ден.
Во моментов имам околу 150 кози, а со козјото млеко правиме сирење и урда.
Козите ги чувам на традиционален начин, но вметнувам и нови методи. Новина е на пример тоа што се коси со косачка, а не како претходно рачно.
