Забранет увоз на пилешко од Бразил и на месо од мали преживари од Албанија
Mерката е донесена по потврдена појава на ново жариште на болеста во областа Дебар, село Кастриот во Албанија, на фарма со 200 кози. Ова е втор пријавен случај во државата, по претходниот во областа Скадар.
Агенцијата за храна и ветеринарство (АХВ) донесе решение за забрана на увоз на пилешко месо од Бразил, поради појава на птичји грип, потврди денеска директорот на АХВ, Оливер Миланов.
„Решението е веќе во сила и претставува мерка на претпазливост со цел да се спречи ризикот од внесување на болеста во земјава“, изјави Миланов.
Освен оваа забрана, АХВ пред пет дена донесе и решение за забрана за увоз и транзит на повеќе производи од Албанија, поради појава на чума кај малите преживари (PPR).
Забраната се однесува на:
- живи домашни и диви мали преживари (како кози и овци)
- семе, јајце-клетки и ембриони
- месо, млеко, преработки и нуспроизводи од овие животни
Како што соопшти Миланов, мерката е донесена по потврдена појава на ново жариште на болеста во областа Дебар, село Кастриот во Албанија, на фарма со 200 кози. Ова е втор пријавен случај во државата, по претходниот во областа Скадар.
Целта на забраните е превенција и заштита на домашниот добиток, но и безбедноста на храната што стигнува до граѓаните. Миланов додаде дека АХВ продолжува со зголемени контроли на граничните премини и инспекциски надзори на увезените производи од животинско потекло.
