На гроздобер од утрото во четири часот, па на работа во канцеларијата во Скопје. Сметководители, одговорни за човечки ресурси, вработени во административниот дел, експерти, енолози, директори на сектори – сите вработени во најголемата винарија во земјава секојдневно прво берат грозје на лозовите насади, после работата ја продолжуваат на своето стандардно место. Не е приказна од кафана, туку е редовна практика во „Тиквеш“, компанијата во која управува познатиот Светозар Јаневски. Во време кога грозјето стаса за берба и треба да се собере, а сезонски работници нема ни за лек, менаџментот на компанијата одлучил на ваков начин да се „билда тимот“ и духот но и одговорноста на вработените кон компанијата во која работат. Не е изземен никој – па без оглед кој на каква позиција работи секојдневно мора да оди на берба. Од Скопје до Кавадарци со автобус, организирано, меѓу 4 и 5 часот наутро, објавува Фактор.
Откако ќе се заврши дел од работата предвидена за тој ден, вработените повторно се враќаат назад. На работа, во компанијата во Скопје.
Извор: Фактор
