Храната поскапува, месото руши рекорди, а земјоделците стравуваат од нова криза
Земјоделците стравуваат од нова криза
Покрај месото, зголемување на цените има и кај зејтинот и пченицата, а високите цени на ѓубривата може драстично да го поскапат овошјето и зеленчукот
Светот повторно се соочува со силен раст на цените на храната, а главниот виновник овојпат не се само климатските промени или нарушените синџири на снабдување, туку и продлабочената геополитичка криза на Блискиот Исток. Според најновиот извештај на Организацијата за храна и земјоделство на Обединетите нации (ФАО), глобалните пазари на храна во април бележат трет последователен месечен раст, поттикнат од високите енергетски трошоци, растот на цените на нафтата и сериозните нарушувања предизвикани од кризата околу Ормускиот Теснец.
ФАО предупредува дека ситуацијата почнува да создава нов притисок врз светската економија и врз потрошувачите, бидејќи растот на цените не се ограничува само на еден сектор, туку ги погодува житарките, растителните масла, месото и транспортот на храна на глобално ниво. Индексот на светските цени на храната, кој ги следи движењата на меѓународните цени на најтргуваните прехранбени производи, во април достигнал 130,7 поени.
