„Македонско најдобро“ ги поврзува домашното производство, производителите и граѓаните

Во изминатиот период, тимови од Министерството за земјоделство, шумарство и водостопанство во соработка со Агенцијата за поттикнување на развојот на земјоделството реализираа серија информативни средби и обуки во Пелагонискиот, Источниот, Вардарскиот и Југоисточниот плански регион, посетувајќи ги општините Битола, Прилеп, Карбинци, Македонска Каменица, Неготино, Велес, Гевгелија и Василево.

Целта на овие активности беше платформата „Македонско најдобро“ да им се доближи на оние за кои е создадена – земјоделците, преработувачите и продажните места кои нудат македонски земјоделски производи и нивни преработки.

За време на средбите, учесниците имаа можност да се запознаат со платформата, начинот на регистрација, придобивките од нивното присуство на платформата, како и можностите за поголема видливост на нивните производи и полесно поврзување со потенцијални купувачи и деловни партнери.

Големиот интерес, активното учество и конструктивните разговори со земјоделците, преработувачите и претставниците на продажните места уште еднаш потврдија дека постои реална потреба од ваква платформа која ќе ги поврзе домашното производство, пазарот и потрошувачите.

„Македонско најдобро“ не е само дигитална платформа – тоа е иницијатива која ги поврзува домашното производство, македонските производители и граѓаните, создавајќи поголема видливост и нови можности за развој на македонското земјоделство.

Преку „Македонско најдобро“ се зголемува свеста за квалитетот, автентичноста и значењето на домашните производи и нивните преработки, се зголемува и зајакнува домашното земјоделско производство и се обезбедува просперитет на руралните средини.

Со секоја нова регистрација се збогатува базата на домашни производи, а со секоја нова локација на мапата граѓаните полесно можат да ги пронајдат и изберат производите со македонско потекло.

Им благодариме на сите земјоделци, преработувачи, претставници на продажните места, како и на сите институции кои активно се вклучија во реализацијата на овие активности.

Продолжуваме на терен, да разговараме, да едуцираме и заедно да ја градиме најголемата национална платформа за промоција на македонското земјоделско производство, со цел да им обезбедиме поголема видливост на домашните производители и полесен пристап на граѓаните до квалитетните македонски производи, објавија од МЗШВ .