Насер Џемаиљи со соопштение – Алармантна е состојбата со сипаниците кај малите преживари

СООПШТЕНИЕ ДО МЕДИУМИТЕ
Од: Сојуз на одгледувачи на овци

​ТЕМА: Алармантна е состојбата со сипаниците кај малите преживари – Бараме итна типизација на вирусот и системска вакцинација на целото национално стадо
​Сојузот на одгледувачи на овци ја информира јавноста и сите надлежни институции дека состојбата со ширењето на болеста заразни сипаници кај малите преживари (овци и кози) во Република Македонија го достигна своето алармантно ниво.
​Секојдневно на терен се соочуваме со информации за регистрирање нови жаришта во повеќе региони од државата. Сегашната состојба се заканува целосно да го десеткува и онака ранливиот сточарски сектор, создавајќи огромни економски загуби за одгледувачите и сериозен ризик за губење на генетиката на националното овчарско и козарско стадо.
​Како Сојуз кој директно ги застапува интересите и егзистенцијата на одгледувачите, апелираме дека досегашните парцијални мерки и затворањето на фармите повеќе не даваат реални резултати на терен.
​Официјален предлог и барање на Сојузот.
​Итна лабораториска типизација на вирусот: Бараме надлежните ветеринарни и научни институции без одложување да извршат прецизна генетска и серолошка типизација на изолираниот Capripox вирус од теренските жаришта.
​Набавка на соодветна вакцина: Врз основа на точната типизација, државата итно да порача и да увезе соодветен вакцински сој кој одговара на кружечкиот вирус, за да се гарантира максимален заштитен ефект.
​Задолжителна вакцинација на целото национално стадо: По пристигнувањето на вакцините, веднаш да се започне со системска и контролирана вакцинација на сите мали преживари на територијата на целата држава.
​Свесни сме за сите предизвици што ги носи вакцинацијата, посебно во делот на меѓународниот промет, но сметаме дека зачувувањето на живиот фонд е апсолутен приоритет. Доколку дозволиме вирусот неконтролирано да влезе во секое бачило, последиците за македонското овчарство ќе бидат трајни и ненадокнадливи.
​Сојузот стои на располагање за сите ветеринарни власти и комисии со цел заеднички, преку конструктивен дијалог и брза теренска акција, да го прекинеме синџирот на пренос и да го спасиме домашниот сточарски сектор.
​Со почит,
Претседател
На Сојуз на одгледувачи на овци
Насер Џемаиљи