Две момчиња од Дебарско херои во Италија, спасиле неколку лица од пожар
Алмир Иљази (31) од село Жировница и Орхан Емро (25) по потекло е од Жупа
Две момчиња по потекло од дебарскиот крај се херои во Италија откако не двоумејќи се влегле во куќа која горела во Виа Паролини, Басано дел Грапа и спасиле четири животи.
Според италијанските медиуми „Македонците – херои се Алмир Иљази и Орхан Емро кои спасиле две постари жени кои се гушеле во чад, уште една жена и дете“.
-Алмир Иљази (31) по потекло е од село Жировница, општина Маврово и Ростуше, а подолг период живее во Италија. Горди сме на неговата храброст, како и на храброста на другото момче. Нивната пожртвуваност е за секоја почит, рече за МИА Медат Куртовски, градоначалник на општина Маврово и Ростуше.
Орхан Емро (25), кој е и италијански државјанин по потекло е од Жупа, живее во Сан Џузепе ди Касола со своите родители и помалиот брат, а во саботата кога се случил настанот случајно поминувал тука.
-Орхан е вработен во Специјал Спрингс во Романо, роден во Аквила, но семејството се преселило во Касола кога Орхан имал една година. Иљази живеел во соседниот објект, осум години е во брак со Семина, негова сонародничка, има две девојчиња на возраст од седум и тринаесет месеци и едно тригодишно момче, наведуваат италијанските медиуми.
Посочуваат дека двете постари жени, детенцето и жената што се грижела за него, кои вдишиле чад, биле преземени од итната медицинска помош и според извори од болницата се во добра состојба.
Двајцата изјавиле дека без размислување притрчале да помогнат иако првпат се соочиле со ваква појава.
– Ако некому му треба помош, не треба да се откажуваш, туку да направиш сè што можеш и да подадеш рака. Среќни сме што спасивме човечки животи. За нас тоа е најбитно, рекле за медиумите.
