Општина Кочани објави повик за обука за економско јакнење на жените земјоделки

Општина Кочани објави повик за обука на жени земјоделки за брендирање, пакување и продажба на земјоделски производи, што ќе се реализира во рамки на серијата тематски обуки за економско јакнење на жените.

Приоритет во спроведувањето на обуката ќе има подобрувањето на пристапот и зголемувањето на конкурентноста на жените на пазарот на труд преку унапредување на нивните бизнис-вештини, како и подобрување на вештините за вработување и самовработување. Исто така, ќе се работи на подобрување на конкурентноста на пазарот на компаниите што ги предводат или се во сопственост на жени.

-Според критериумите во конкурсот, кандидатките кои ќе пројават интерес треба да се на возраст од над 18 години, со минимум завршено средно образование и да се жителки на општина Кочани. Во обуката што ќе се спроведе онлајн ќе бидат опфатени 20 жени кои треба да се невработени или вработени во земјоделскиот сектор, да имаат идеја за започнување земјоделски бизнис, сопствен бизнис во земјоделскиот сектор или да се косопственички на таков бизнис. Предност ќе имаат жените чии бизниси не се постари од пет години. Пријавувањето за учество на обуката е електронски или со писмена пријава во Општина Кочани, најдоцна до 2 ноември. При изборот на учесничките ќе се следи принципот „прва пријавена – прва услужена, истакна Љубинка Ајтовска, координаторка за еднакви можности на жените и мажите во општина Кочани.

Од локалната самоуправа на Кочани ги повикуваат да се пријават и жените од ранливите категории, односно самохрани мајки, жени од рурални средини, жртви на семејно насилство и жени со попреченост.

Обуката ќе се реализира со Фондацијата ЦЕЕД Македонија, како дел од проектот на UN Women – „Промовирање на родово одговорни политики и буџети: кон транспарентно, инклузивно и отчетно управување во Република Северна Македонија“, финансиски поддржан од Швајцарската агенција за развој и соработка и Шведската агенција за меѓународна соработка и развој – СИДА.