Големите компании го откупуваат тутунот

Големите откупни компании почнаа со откупот на тутунот. Покрај Прилепскиот тутунски комбинат,  тутунот се откупува и во „Алијанса“ од Кавадарци и „Струмица табак“, а од понеделникот вратите на пунктовите ги отвори и „Сокотаб“ од Битола.

Според Сојузот на тутунските здруженија, годинашната реколта е над 20.000 тони и е помала од ланската, но е поквалитетна. Затоа тутунарите очекуваат солидна откупна цена и реална процена на вагите на откупните пунктови.

– Тутунарите се задоволни од почетокот на откупот. Така очекуваат да продолжи. Големите откупни претпријатија ги отворија пунктовите. До понеделник сите девет откупувачи ќе го проценуваат родот на вкупно 186 ваги на 152 откупни пункта во земјава. Моментално се откупува на 85 ваги, изјави претседателот на Сојузот, Данчо Милески.

Во посета на пунктовите во Прилеп вчера беше заменик министерот за земјоделство Ванчо Костадиновски, кој ги посети пунктовите на „Сокотаб“ од Битола и градскиот пункт на Прилепскиот тутунски комбинат.