Списоците за државните 6.000 денари готови до крај на неделава: Парите ќе се трошат без рок

И по предвидениот рок односно и после 25 декември ќе можат да ги трошат граѓаните државните 6.000 денари. Од Владата информираат дека тие се пари за граѓаните и дека ќе можат да ги користат непречено веднаш после уплатата на сметка. Ваква поддршка ќе добијат околу 300.000 граѓани. До крајот на неделата страницата kupuvamdomasno.gov.mk се очекува да биде ажурирана за граѓаните да може да проверат дали се на листата со внесување на својот матичен број.

„Препораката за искористување на средствата до 25 декември останува со цел до крајот на годината да се инјектираат и ликвидни средства во стопанството за кус период, да се купуваат македонски производи и на тој начин да се дејствува врз раздвижување на економската активност. Доколку не беа опструкциите и блокадите во Собранието од страна на опозицијата за навремена реализација на четвртиот пакет економски мерки, граѓаните ќе беа во можност своите средства да ги користат доста порано, а со тоа и економската активност во државата ќе се подобреше порано, стои во известувањето од Владата.

Оваа мерка е од четвртиот пакет за финансиска поддршка на ранливи категории граѓани. По 6.000 денари на сметка добиваат граѓаните со низок доход, пензионери кои имаат до 15.000 пензија, корисници на право на социјална сигурност на стари лица, млади лица од 16 до 29 години, самохрани родители, деца без родители и родителска грижа, уметници и други лица кои вршат дејност во културата, филмски работници и естрадни уметници. За оваа мерка која ќе се реализира преку исплаќање на средствата на постоечката трансакциска сметка на граѓаните, испроектирани се вкупно 27,5 милиони евра.https://faktor.mk/spisocite-za-drzavnite-6000-denari-gotovi-do-kraj-na-nedelava-parite-kje-se-troshat-bez-rok