Хоџа: Во координација со ЕУ, да го заштитиме здравјето на животните и економскиот интерес на сточарите

Хоџа: Во координација со ЕУ, да го заштитиме здравјето на животните и економскиот интерес на сточарите

Состојбата со сипаниците кај овците во источниот дел на земјата континуирано се следи од надлежните институции. Од околу 30 регистрирани жаришта, во моментов активни останаа 11, изјави заменик-министерот за земјоделство, шумарство и водостопанство, Албрим Хоџа.

„Агенцијата за храна и ветеринарство, преку Амбасадата на Турција, побара 500 илјади дози вакцини. За вакцинацијата сме во координација со Европската Унија, бидејќи една ваква одлука може да влијае врз извозот на јагнешко месо во земјите на ЕУ“, изјави Хоџа.

Тој нагласи дека за ова прашање постојат различни ставови и меѓу сточарите. Во погодените региони има барања за вакцинација, додека сточарите од западниот дел на земјата, каде што болеста досега не е регистрирана, изразуваат загриженост дека вакцинацијата може да влијае врз извозот.

„Мора да го заштитиме здравјето на животните, но истовремено и економскиот интерес на сточарите“, истакна Хоџа.

—-