Поранешниот министер Џевдет Насуфи од Струга е тој што го пријавил директорот на Платежната агенција Илија Стоилев за земање мито
Детали за денешната акција на МВР, објави Фокус
Поранешниот министер за локална самоуправа од ВМРО-ДПМНЕ во владата на Љубчо Георгиевски, Џевдет Насуфи од Струга е тој што го пријавил директорот на Агенцијата за финансиска поддршка во земјоделството и руралниот развој, Илија Стоилев за земање мито, неофицијално дознава https://fokus.mk/
Според нашите информации, вмешана е уште една вработена во Агенцијата блиска на актуелниот директор, која наводно била посредникот во целата приказна. Нашите извори тврдат дека досега се приведени четворица, но постои можност да има уште апсења.
Како што неофицијално дознаваме, станува збор за поголема сума на пари, а акцијата е поврзана со пријава дека Стоилев побарал и примил мито од апликант за да му се додели договор за финансиска поддршка преку програмата ИПАРД. По пријавата во МВР, на апликантот му биле дадени обележани банкноти, со чија помош директорот бил фатен при земањето на парите.
Акцијата ја спроведе Обвинителството за гонење организиран криминал и корупција (ОЈО ГОКК) во соработка со истражителите од Истражниот центар при ОЈО ГОКК и екипи на Министерството за внатрешни работи.
Според првичните информации, биле извршени претреси на повеќе локации низ земјата поради основани сомневања за коруптивни активности. Попладнево, тимови од Управата за финансиска полиција, МВР и истражители влегле во просториите на Агенцијата за финансиска поддршка во земјоделството и руралниот развој.
Фокус
